५ मंसिर, डडेल्धुरा । जिल्ला ट्राफिक प्रहरी कार्यालय, डडेल्धुराले नियमविपरीत जीपमा थपिएका सिट हटाउन शुरु गरेको छ ।
जिल्लाका ग्रामीण क्षेत्रमा सञ्चालित पिकअप जीपहरुले क्षमताभन्दा बढी यात्रु बोकेका कारण दुर्घटना बढेको निष्कर्ष निकाल्दै बढी सिट निकाल्न लागिएको ट्राफिक कार्यालय, डडेल्धुराका इन्चार्ज गणेश सिंह नागरिले जानकारी दिए ।
यातायात व्यवस्था कार्यालयले पाँच सिट पास गरेको भए पनि पिकअप जीपहरुले पछाडिको भागमा सिट थप्दै बढी यात्रु बोक्दै आएका छन् । डडेल्धुरामा हाल सिट पास भएका १ सय २५ पिकअप जीप छन् ।
ट्राफिक प्रहरी कार्यालय डडेल्धुराले दुई दिनको अवधिमा ७० पिकअप जीपको पछाडिको सिट हटाएको छ ।
डडेल्धुराका ग्रामीण सडकसहित पोखरा, डोटीको दीपायल, बैतडीको खोड्पे, पाटनमा पिकअप जीपले यात्रु बोक्दै आइरहेका छन् । यस्ता जीपहरुले ५ सिट मात्रै राख्न पाउने नियम बसालिएको भए पनि क्षमताभन्दा पाँच गुणा बढी यात्रु बोक्ने गरेका छन् ।
