१४ असोज, काठमाडौं । इंग्लिस प्रिमियर लिग फुटबलमा साविकको विजेता म्यानचेस्टर सिटीले शीर्ष स्थानमा उक्लिएको छ ।
शनिबार राति भएको खेलमा ब्राइटन एण्ड होभ आल्बियनलाई २–० गोलको सहज जित निकाल्दै सिटीले महत्वपूर्ण ३ अंक बटुलेको हो ।
सिटीलाई जित दिलाउन रहिम स्टर्लिङ र सर्जियो अग्युरोले गोल गरे । खेलको २९ औं मिनेटमा स्टर्लिङले गोल गर्दै सिटीलाई अग्रता दिलाएका थिए । पहिलो हाफमा १–० गोलले अघि रहेको सिटीले दोस्रो हाफमा थप १ गोल गर्न सफल भयो । खेलको ६५ औं मिनेटमा अग्युरोले गोल गर्दै सिटीलाई दोब्बर अग्रता दिलाएका थिए ।
प्रिमियर लिग अन्तर्गत नै भएको अन्य खेलमा टोटनह्यामले हडर्सफिल्डलाई २–० ले, एभर्टनले फुलहमलाई ३–० ले, लेष्टर सिटीले न्युक्यास्टललाई २–० ले र वोल्भस्ले साउथह्याम्टपनलाई २–० गोलले पराजित गरेका छन् ।
शीर्ष स्थानमा रहेको सिटीको ७ खेलबाट १९ अंक भएको छ । लिभरपुलको पनि समान १९ अंक नै भएपनि गोलको आधारमा सिटी अगाडि रहेको हो ।
