३ मंसिर, झापा । झापाको एक अस्पतालबाट निस्किने फोहोरको उपयुक्त व्यवस्थापन नहुँदा वातावरण प्रदूषित भएको स्थानीयले गुनासो गरेका छन् ।
जिल्लाको दमक—२ स्थित आम्दा अस्पतालबाट निस्किने फोहोरको उचित व्यवस्थापन हुन नसक्दा स्वास्थ्यमा समेत असर पर्ने गरेको गुनासो स्थानीयले गरेका हुन् ।
अस्पतालबाट निस्कने सिरिन्ज लगायत प्लास्टिक, कपडा तथा धातुजन्य फोहोरको उचित व्यवस्थापन नहुँदा वातावरण प्रदुषण हुने गरेको छ । अस्पतालको फोहोर थुपार्ने, गाड्ने र जलाउने स्थान बस्ती नजिक हुँदा स्वास्थ्यमा असर परेको दमक—२, संगम टोलकी सीता श्रेष्ठ बताउँछिन् ।
अस्पतालबाट निस्कने कतिपय प्रकारका फोहोरलाई मेसिनले टुक्र्याएर जलाउने गरेको भएपनि त्यहाँबाट उत्पन्न हुने दुर्गन्धले आसपासका बासिन्दालाई असर पुग्ने गरेको उनको भनाइ छ । फाहोर जलाउँदा निस्कने दुर्गन्ध र धुँवा संगम टोल, खरखरे आम्दा, एभरेष्ट लाइनका घरभित्रै पुग्ने गरेको उनले बताइन् ।
अस्पतालजन्य फाहोर खुल्ला ठाउँमा राख्दा वा त्यसबाट निस्कने धुँवा हावाको माध्यमबाट संक्रमण फैलन सक्ने भएको पनि अस्पतालले मानव स्वास्थ्यमा चासो देखाएको छैन ।
फाहोर र प्रदुषणकै कारण पहिलेभन्दा धेरै लामखुट्टे, झिँगा लाग्ने गरेकोले स्थानीय झाडापखाला लगायतका संक्रमण फैलन सक्नेमा चिन्तित छन् । फाहोरमैला उचित व्यवस्थापनका लागि आफुहरुले नगरपालिका र अस्पताल प्रशासन छलफल गरेपनि कसैले चासो नदिएको स्थानीयको भनाइ छ ।
स्थानीयका अनुसार अस्पताल प्रशासनले अस्पतालजन्य फोहोरको उचित व्यवस्थापन गर्न नसक्दा मानव स्वास्थ्यसँगै पर्यावरणमा समेत प्रतिकुल असर पर्दै गएको छ ।
चिकित्सकका अनुसार स्वास्थ्य संस्थाहरुबाट निष्कने प्लाष्टिकजन्य फोहोरहरुलाई जलाउँदा हावासँगै डायोक्सिन नामक अति विषालु क्यान्सरजन्य ग्याँस हावामा फैलिने र औषधिका सिसाहरु तथा त्यसमा बाँकी झोल औषधी, औषधीको पाताहरुलाई उचित प्रशोधन विना माटो या पानीमा मिल्न दिँदा माटोको उर्वराशक्तिमा, जलाशयहरुको पानीको गुणस्तरमा तथा जलचर प्राणीहरुमा एकदमै नकारात्मक प्रभाव पर्छ ।
अस्पताल प्रशासनले भने अस्पतालबाट निस्कने फोहोरलाई अति जोखिम, कम जोखिम र जोखिममुक्त गरी तीन भागमा वर्गिकरण गरेर जलाउने, गाड्ने वा नष्ट गर्ने गरेको जनाएको छ । अस्पताल छेउछाउ बस्ती बढ्दै गएकाले आगामी दिनमा अस्पतालजन्य फोहोरको उचित व्यवस्थापनका लागि नगरपालिकासँग सहकार्य गरेर काम गर्ने तयारी भइरहेको अस्पतालका मेडिकल सुपरिटेन्डेन्ट डाक्टर नविन ढकालले बताए ।
– शम्भु दाहालबाट
