१८ असोज विराटनगर । प्रदेश १ को राजधानी विराटनगर नै बनाउन माग गर्दै विराटनगरका ६३ वटा सामाजिक संघ संस्थाले प्रधानमन्त्रीलाई ज्ञापनपत्र पठाएका छन् ।
उनीहरुले प्रदेश १ का सभामुख र मुख्यमन्त्रीमार्फत प्रधानमन्त्री केपी शर्मा ओलीलाई ज्ञापनपत्र बुझाएका छन् ।
उद्योग संगठन मोरङ, मोरङ व्यापार संघको अगुवाईमा आएको टोलीले पूर्वाधार र सामथ्र्यका कारण राजधानी बन्न विराटनगर नै उपयुुक्त भएको दावी गरेका छन् ।
उद्योगी व्यापारीहरुले राजधानीको पर्याप्त आधार हुँदाहुँदै अन्यत्र लगे संघीयता र समृद्धिको नारा सार्थक नहुनेतर्फ सभामुख भण्डारीको ध्यानाकर्षण गराएका थिए ।
ज्ञापनपत्र बुझ्दै सभामुख प्रदीपकुमार भण्डारीले विराटनगरका सरोकारवालाको सुझाव सम्बन्धित ठाउँमा जानकारी गराउने बताए । आन्तरिक मामिला तथा कानूनमन्त्री हिक्मत कार्कीले राजधानीको विषयमा संसदले ठोस निर्णय गर्ने भएको कारण अहिले नै आत्तिन नहुने बताए ।
प्रदेशको नाम र राजधानीको टुंगो लगाउन नेकपाको संसदीय दलमा छलफल भइसकेको छ भने नेपाली कांग्रेसको संसदीय दलको बैठक जारी छ ।
प्रदेशसभाको २ तिहाई मतले प्रदेशको नाम र राजधानीको टुंगो लगाउने संवैधानिक व्यवस्था छ । सरकारले संसदको यही अधिवेशनमा यो विषयलाई टुंग्याउने तयारी गरेको छ ।
