१६ असोज, कैलाली । सशस्त्र प्रहरीले भन्सार छलेर ल्याइँदै गरेको कपडासहित दुई थान मोटरसाइकल नियन्त्रणमा लिएको छ ।
सशस्त्र प्रहरी बल, कैलाली ३४ नम्बर गणले कैलालीको घोडाघोडी नगरपालिका–७ विजुलिया पुलबाट रेडिमेड कपडाहरु बोकेर आउँदै गरेका से. ४ प ३९०८ र से. ४ प २०३० नम्बरको मोटरसाइकल नियन्त्रणमा लिएका गणका प्रमुख सशस्त्र प्रहरी नायब उपरीक्षक (डीएसपी) विष्णुप्रसाद भट्टले जानकारी दिए ।
नियन्त्रणमा लिई भन्सार बुझाइएका २ थान मोटरसाइकलसहित सामानहरुको मूल्य २ लाख ३९ हजार ८ सय रुपैयाँ कायम गरिएको डीएसपी भट्टले जानकारी दिए ।
गणले यसअघि गत असोज ६ गते सोही स्थानबाट दुई थान मोटरसाइकल र रेडिमेड कपडाहरु नियन्त्रणमा लिएर भन्सार कार्यालय बुझाएको थियो ।
खुला सिमानाका सीमित जनशक्तिका कारण चोरी तस्करी नियन्त्रणमा केही चुनौती रहेकाले आफू मातहतका सबै युनिटहरुलाई कडाइ गर्न निर्देशन दिएको उनले बताए ।
