२० कात्तिक, रामेछाप । रामेछापको दोरम्बा गाउँपालिकाको केन्द्र टोकरपुरमा २ दिने नागरिकता वितरण शिविर सम्पन्न भएको छ ।
आइतबार र सोमबार दोरम्बा गाउँपालिकाका नागरिकता प्राप्त गर्ने उमेर पुगेका नागरिकलाई नागरिकताको प्रमाणपत्र वितरण गरिएको हो ।
नागरिकता वितरण शिविरमा ५ सय ७ जनाले नेपाली नागरिकताको प्रमाणपत्र लिएका छन् । जसमा २ सय ७३ जना महिला र २ सय ३४ पुरुष रहेका छन् ।
गाउँघरमा नै नागरिकहरुलाई सेवा दिने उद्देश्य जिल्ला प्रशासन कार्यालय रामेछापको आयोजना र दोरम्बा गाउँपालिकाको समन्वयमा २ दिने नागरिकता वितरण शिविर आयोजना गरिएको थियो ।
उमेर पुगेका नागरिकहरुलाई सदरमुकाम धाउनै पर्ने वाध्यताबाट मुक्ति दिन गाउँगाउँमा नेपाली नगारिकताको प्रमाणपत्र वितरण शिविर सञ्चालन गरिएको रामेछापका प्रमुख जिल्ला अधिकारी कृष्णप्रसाद शर्माले जानकारी दिए ।
यस्तै शिविर अघिल्लो हप्ता रामेछापको खाँडादेवी गाउँपालिकामा आयोजना गरिएको थियो । शिविरबाट स्थानीलये गाउँमा नै सेवा पाएको दोरम्बा गाउँपालिकाका अध्यक्ष कमानसिंह मोक्तानले जानकारी दिए ।
दोरम्बा रामेछापको सबैभन्दा टाढाको दुर्गम गाउँपालिका हो । काभ्रे र दोलखासंग सिमाना जोडिएको सो गाउपालिकाको गौश्वाराका नागरिकलाई सदरमुकाम आउन २ दिन लाग्दछ ।
गाउँमानै शिविर सञ्चालन हुँदा एकैदिनमा नागरिकता बनाएर घर र्फकन पाएकोमा स्थानीयले गाउँमानै सरकार आएको अनुभूति गरेका छन् ।
