१९ कात्तिक, काठमाडौं । काठमाडौं महानगरपालिकाका मेयर विद्यासुन्दर शाक्यले मेलम्ची खानेपानीको पाइपलाइन र सडक विस्तारका कारण काठमाडौंलाई धुँवाधुलो मुक्त सहर बनाउन कठिन भएको बताएका छन् ।
मेयर शाक्यले चालु आर्थिक वर्षभित्र काठमाडौंलाई हिलो र धुलोरहित सहर बनाउन आवश्यक व्यवस्था मिलाइएको दावीसमेत गरे ।
सोमबार काठमाडौंमा आयोजित साक्षात्कार कार्यक्रममा बोल्दै उनले सडक विभाग र मेलम्ची खानेपानी आयोजनासँग समन्वय गरेर काठमाडौंलाई धुवाँधुलो मुक्त बनाउन आफूले प्रयास गरिरहेको जानकारी दिए ।
मेयर शाक्यले आफूले १७ महिना भित्र काठमाडौं महानगरपालिका भित्र धेरै काम गरेको दावी गरे । आफ्नो जिम्मामा रहेको सहायक सडकको पुनर्निर्माणको काम धेरैजसो भइसकेको उनको भनाइ छ ।
मेयर शाक्यले सम्पदा पुनर्निर्माणको कामलाई पनि धेरै अघि बढाइएको दावी गरेका छन् । उनले रानी पोखरी पुनर्निर्माणको काममा पनि ढिलाइ नहुने योजना अघि सारे ।
पुरातत्व विभाग र राष्ट्रिय पुनर्निर्माण प्राधिकरणसँग आवश्यक छलफल गरेर रानीपोखरी पुनर्निर्माणको काम सुरु गर्ने मेयर शाक्यको योजना छ । उनले काष्ठ मण्डप र धराहरा पुनर्निर्माणको काम सुरु गरिएको स्मरणसमेत गराएका छन् ।
मेयर शाक्यले मापदण्ड विपरीत बनेको भवनलाई कडा कारबाही गर्ने चेतावनी पनि दिए । उनले चालू आर्थिक वर्षमा महानगरपालिकाले सडक पुनर्निर्माण र सम्पदा पुनर्निर्माणको कामलाई जोड दिएको पनि स्पष्ट पारेका छन् ।
