‘गरिब भएर जन्मनु तिम्रो दोष होइन, बरु गरिब भएर मर्नु तिम्रो गल्ती हो ।’
भनाईको सार के हो भने, हामी धनी हुने जन्मले होइन, आफ्नो कर्मले हो । जब जन्मन्छौं, त्यही दिनदेखि हाम्रो जीवन अनेक परीक्षाबाट गुज्रन थाल्छ । यी परीक्षामा हामी आफुलाई कति उत्कृष्ट ढंगले अगाडि बढ्न सक्छौं भन्ने कुराले नै समग्र हाम्रो जीवनको मूल्यांकन गर्छ । अर्थात हामी जीवनमा जति उत्कृष्ट ढंगले, जति सार्थक ढंगले, जति सकारात्मक ढंगले कुनै कर्म गर्छौं, त्यही नै हाम्रो जीवनको उपलब्धी हुनेछ ।
यो संसारमा यस्ता व्यक्ति छन्, जोसँग अथाह धन-सम्पति छ । यो संसारमा यस्ता व्यक्ति छन्, जोसँग एक छाक टार्ने खाद्यन्न छैन ।
यो संसारमा यस्ता व्यक्ति छन्, जो समयको रफ्तारभन्दा बढी गतिशिल काम गरिरहेका छन् । यो संसारमा यस्ता व्यक्ति छन्, जो पट्यारलाग्दो दैनिकीमा ‘टाइम पास’को वाहाना खोजिरहेका छन् ।
यो संसारमा यस्ता व्यक्ति छन्, जसको कमाईले आफ्ना अरु लाखौं असाह्यहरु पालिएका छन् । यो संसारमा यस्ता व्यक्ति छन्, जो अरुको कमाईमा अश्रति जीवन विताइरहेका छन् ।
यी दुबैथरी व्यक्ति उसैगरी जन्मिएका हुन् । उस्तै कोखमा जन्मिएका हुन् । तर, आफ्नो कर्म, जाँगर, क्षमता, बुद्धिले एकथरी संसार जितिरहेका छन् । आलस्य, लाचारी, लापरवाही, अविवेकको कारण अर्काथरी दुःखी र गरिब छन् ।
भनाईको सार के हो भने, आफ्नो बल, विवेक, जाँगर र कर्मले धनसम्पति आर्जन गर्नेहरु आफैमा एक यस्तो पाठ हो, जसबाट हामीले धेरै उपयोगी कुरा सिक्न सक्छौं ।
यतिबेला हामी तिहारको संघारमा छौं । तिहारलाई लक्ष्मीको पूजाआर्जा गरिन्छ, जो धनको प्रतिक हो । जीवनमा पूर्णता पाउनका लागि धन पनि आवश्यक हुन्छ भन्ने यसले संकेत गर्छ । यसै सन्दर्भमा हामीले यहाँ विश्वका धनाड्यहरुको आनीबानी कस्ता हुन्छन् भन्ने कुरा पेश गरेका छौं ।
अक्सर हामी सुन्छौं, फलानो फोब्र्सको धनाड्य सूचीमा छन् । फलानोको सम्पति यति अर्ब डलर छ । जेफ बेजोस, वारेन बफे, बिल गेट्स, मार्क जुकरबर्ग यस्तै नाम हुन् । अब उनीहरु कसरी धनाड्य बने होलान् ?
हामी पनि पैसा वा धन दौलत आर्जन गर्नकै खातिर रातदिन दौडन्छौं । तर, हामीले अपेक्षाकृत नतिजा हासिल गरिरहेका हुँदैनौ । तर, ति धनाड्यहरु कसरी त्यती सम्पतिका मालिक भए ? उनीहरुले कस्तो कार्यशैली अपनाए ? यो निकै घतलाग्दो कुरा हो ।
अतः यहाँ धनाड्यहरुको पाँच आनीबानीबारे चर्चा गरिएको छ ।
आफुमाथि केन्द्रित
आम व्यक्ति अक्सर अरुको कुरा सुनेर आफ्नो धारणा बनाउँछन् । अरुले के भन्छन्, के सोच्छन् भनेर त्यही अनुसार आफ्नो कामको शैली बनाइरहेका हुन्छन् । तर, धनाड्यहरु फरक हुन्छन् । उनीहरु आफ्नो जीवनमा केही गर्नुछ भने त्यसमा अरुले के सोच्छन् वा के भन्छन् भन्ने कुराले कतिपनि विचलित हुँदैनन् । उनीहरु बस् आफुमाथि विश्वास गर्छन् । अर्कामाथि केन्द्रित हुनुभन्दा आफैमाथि केन्द्रित रहन्छन् ।
धनाड्यहरुमा यस्तो आत्माविश्वास हुन्छ कि, आफुले गरेको काममा पूर्णता दिलाएरै छाड्छन् । उनीहरु न अरुप्रति निर्भर हुन्छन्, न अरुप्रति केन्द्रित नै । उनीहरु आफुमाथि केन्द्रित रहेर काममा तल्लिन रहन्छन् ।
कर्म सबैभन्दा महत्वपूर्ण
अक्सर हामी जिन्दगीमा रमाइलोको खोजी गर्छौं । विवाह, भोज आदिमा समय बर्बाद गरिरहेका हुन्छौं । तर, धनाड्यहरुको सम्पूर्ण ध्यान काममा हुन्छ । उनीहरु अनावश्यक समयको खर्च गर्दैनन् । किनभने उनीहरुका लागि सबैकुरा काम हुन्छ ।
उनीहरु कुनैपनि काम गर्नुअघि लक्ष्य तय गर्छन् । त्यही लक्ष्य प्राप्तिका लागि तल्लिन रहन्छन् । यसबीचमा उनीहरु आफ्नो लक्षित कामभन्दा दायाँबायाँ पटक्कै लाग्दैनन् । अर्थात धनाड्यहरुका लागि काम नै पूजा हो ।
आम व्यक्ति सानोतिनो समस्यामा अल्भिmरहेका हुन्छन् । धनाड्यहरु भने आफ्नो काममा केन्दि्रत रहन्छन् र उनीहरुलाई सानोतिनो समस्याले अल्झाउँदैन । अर्को कुरा उनीहरुलाई आफ्नो उदेश्य वा लक्ष्य कसरी प्राप्त गर्ने भन्ने ज्ञान हुन्छ । यसले पनि उनीहरुलाई आत्माविश्वास र खुसी दिलाइरहेको हुन्छ । त्यही कारण उनीहरु अन्य रमाइलोमा नलागी आफ्नो काममा तल्लिन हुने गर्छन् ।
व्यवस्थापनको कला
हामी स-सना कुरा व्यवस्थापन गर्न नजानेर वा नसकेर दिक्क मानिरहेका हुन्छौं । आफ्नै दैनिक जीवन पनि हामीलाई झन्झटिलो लाग्छ । खाने, लाउने, काम गर्ने, रमाइलो गर्ने कुराको सही व्यवस्थापन गर्न नसक्दा अस्तव्यस्त हुन्छ ।
तर, धनाड्यहरु आफैमा यति कुशल व्यवस्थापक हुन्छन्, जसले हरेक कुरालाई ठिक ढंगले व्यवस्थापन गरिरहेका हुन्छन् । यस्ता व्यक्तिहरुको आफ्ना व्यक्तिगत व्यवस्थापक त हुन्छन्, तर उनीहरु स्वयम् पनि कुनैपनि कामलाई उत्कृष्ट ढंगले व्यवस्थापन गर्न सक्षम हुन्छन् ।
कहाँ, कसरी, कुन काम गर्ने भन्ने कुरामा कतिपनि अलमल गर्दैनन् । ठिक समयमा, ठिक निर्णय लिने र ठिक ढंगले काम गर्ने कुशलता उनीहरुमा हुन्छ ।
हामी समाजमा धेरै मान्छे भेट्छौं, जो ‘टाइम पास’को वाहाना खोजिरहेका हुन्छन् । यस्तो वाहाना खोज्दै कोही सपिङमा त, कोही सिनेमा हलमा धाइरहेका हुन्छन् । कोही तासको खालमा जमिरहेका हुन्छन् त कोही चिया-गफमा तल्लिन हुन्छन् । तर, धनाड्यहरु यसरी समय नष्ट गर्दैनन् । कतिसम्म भने अहिले गर्नुपर्ने काम भोलिको लाथि थाँती राखियो भने त्यसले कतिसम्म असर गर्छ भनेर उनीहरु सचेत रहन्छन् ।
सोच महान
करोडौं कमाइ गर्ने व्यक्ति र सामान्य व्यक्तिमा स्पष्ट देखिने एउटा अन्तर हो, उनीहरुको सोच्ने शैली ।
सामान्य मानिस ठूला कुरा सोच्दैनन् । जबकी धनाड्यहरु सानो काम नै आँक्दैनन् । उनीहरु ठूलो फड्को मार्ने सोंच लिएर अगाडि बढ्छन् । ठूलो चुनौती सामाना गर्ने सामर्थ्य लिएर अगाडि बढ्छन् । त्यही कारण उनीहरु सफल हुन्छन् । हामीकहाँ पनि भनाई छ नि, उदेश्य के लिनु, उडी छुनु चन्द्र एक ।
