७ कात्तिक, काठमाडौं । दशैं सकिएलगत्तै तरकारीको भाउ हृवात्तै घटेको छ । उत्पादनमा भएको वृद्धि र दशैंका बेला खपत कम भएका कारण तरकारीको भाउमा ठूलो गिरावट आएको हो ।
तरकारीको भाउ ३० देखि ४० प्रतिशतसम्मले घटेको कालिमाटी फलफूल तथा तरकारी व्यवसायी महासंघका अध्यक्ष खोमप्रसाद घिमिरेले बताए । दशै शुरु भएसँगै तरकारीको भाउमा उल्लेख्य गिरावट आएको अध्यक्ष घिमिरेले जानकारी दिए ।
‘काउली यतिबेला प्रतिकिलो २५ रुपैयाँसम्म बिक्री भएको छ, अघिल्लो हप्ता ४० रुपैयाँमा बिक्री हुने गरेको बन्दा अहिले २५ रुपैयाँमा पनि बिक्री हुन गाह्रो छ’ अध्यक्ष घिमिरेले अनलाइनखबरसँग भने, ‘गत वर्षको दाँजोमा ४० प्रतिशतसम्म तरकारीको मूल्यमा गिरावट आएको छ ।’
उत्पादनमा वृद्धि र खपत भएका कारण तरकारीको मूल्यम गिरावट आएको उनको भनाइ छ । उनले आलुबाहेक सबै तरकारीको मूल्य घटेको बताए । नयाँ उत्पादन आइनसकेको र पुरानो उत्पादन सकिएको साथै भारत, बंगलादेश र भुटानमा समेत मूल्य बढेका कारण आलुको मूल्य भने घट्न नसकेको उनले बताए ।
तरकारीको मूल्यमा भारी गिरावट आउदा तरकारी उत्पादक किसानहरु मार्कामा परेका छन् ।
