२२ असोज, काठमाडौं । बार्सिलोना स्पेनिस ला लिगा फुटबलमा भ्यालेन्सियासँग बराबरी खेलेसँगै बार्सिलोना लिगको दोस्रो स्थानमा झरेको छ ।
सोमबार बिहानभएको खेलमा बार्सिलोनाले भ्यालेन्सियासँग १–१ गोलको बराबरी खेलेको हो । बराबरीसँगै शीर्ष स्थानमा कायमै रहने अवसरलाई गुमाउँदै बार्सिलोना दोस्रो स्थानमा झरेको हो ।
आफ्नै घरेलु मैदानमा भएको खेलमा भ्यालेन्सियाले बार्सिलोनाविरुद्ध उत्कृष्ट प्रदर्शन गर्याे । खेलको दोस्रो मिनेटमा नै जिक्वएल गेरयले गोल गर्दै भ्यालेन्सियालाई १–० गोलको अग्रता दिलाएका थिए । तर, खेलको २३औं मिनेटमा लियोनल मेस्सीले गोल गर्दै खेल १–१ गोलको बराबरीमा पुर्याएका थिए ।
पहिलो हाफमा १–१ गोलको बराबरीमा सकिएको थियो भने दोस्रो हाफमा दुबै टिमले गोल गर्न नसकेपछि १–१ अंक बाँडेका हुन् ।
८ खेलबाट १५ अंक बनाएको बार्सिलोना दोस्रो स्थानमा झर्दा सेभिल्ला भने पहिलो स्थानमा उक्लिएको छ । सेभिल्लाको ८ खेलबाट १६ अंक रहेको छ ।