अमेरिकी सहर वाइनकस्थित अदालतमा एकजना न्यायाधीशले यस्तो हर्कत गरेका छन् जसले अदालतका सबै मानिसलाई खुबै मनोरञ्जन मात्र दिलाएन ती न्यायाधीशको प्रसंसा गर्नपनि सबै मानिस बाध्य भए ।
ती न्यायाधीशको नाम आर डब्लू बजार्ड हो । लुइस काउन्टी अदालतका न्यायाधीश हुन् उनी ।
उक्त अदालतमा सुनुवाई भैरहेको बेला दुईजना अभियुक्तहरु भाग्ने प्रयास गरे । अदालतबाट अभियुक्तहरु भाग्न थालेपछि ती न्यायाधीश आफ्नो आसनबाट उठेर पछि पछि दौडिए ।
अमेरिकी एक न्यूज च्यानलले उक्त अदालतको भिडियो सार्वजनिक गरेको छ । जुन अहिले सोसल मिडियामा निकै भाइरल बनेको छ ।
अदालतमा सुनुवाइका क्रममा त्यहाँ सुरक्षा कर्मी नभएको मौका छोपेर अभियुक्तहरु भाग्ने कोसिस गरेका थिए । त्यो देखेपछि न्यायाधीश बजार्ड आफ्नो कुर्सीबाट जुरुक्क उठे । आफुले लगाएको गाउन काढेर फ्याँके र भाग्ने अभियुक्तको पछि पछि भागे ।
त्यसक्रममा एकजना अभियुक्तलाई समाउन सफल हुन्छन् बजार्ड । अर्को अभियुक्तलाई सुरक्षाकर्मीले पक्राउ गरे ।
अन्ततः न्यायाधीशकै अग्रसरतामा पक्राउ परेका ती दुई अभियुक्तलाई अदालतबाट भाग्ने कोसिस गरेको थप मुद्दा चलाइएको छ ।
एजेन्सी
